Қолаверса, Давлат раҳбарининг 2021 йил 11 сентябрдаги “Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) фаолиятини такомиллаштириш чора-тадбирлари тўғрисида”ги Фармонига кўра, Омбудсманнинг энг устувор вазифаларидан бири сифатида аҳоли орасида инсон ҳуқуқлари, эркинликлари ва қонуний манфаатларини таъминлаш ҳамда ҳимоя қилиш соҳасидаги халқаро ва миллий қонунчилик нормаларини тарғиб қилиш, шунингдек, аҳолининг ҳуқуқий онги ва ҳуқуқий маданиятини оширишга кўмаклашиш белгиланган.
Шу нуқтаи назардан республика бўйлаб аҳолининг ҳуқуқий хабардорлигини оширишга қаратилган “Омбудсман мактаби” лойиҳаси амалга оширилмоқда.
2023 йил 21 июнь куни “Омбудсман мактаби” лойиҳаси доирасида Навбаҳор туманида аҳоли бандлигини таъминлаш аҳолини ижтимоий ҳимоя қилиш ёшларни қўллаб-қувватлаш уларнинг қонуний ҳуқуқ va манфаатларини таъминлаш борасидаги ислоҳотларга бағишланган тадбир ташкил этилди.
“Омбудсман мактаби” лойиҳасини амалга оширишдан мақсад –аҳолини мамлакатимизда инсон ҳуқуқ ва эркинликларини ҳимоя қилиш соҳасидаги туб ўзгаришлар тўғрисидаги хабардорлигини оширишдан иборат. Сабаби фуқаролар ўз ҳуқуқларини яхши билмас эканлар, уларни талаб қила олмайдилар. Натижада қонун бузилиш ёки уни четлаб ўтиш ҳолатлари кўпайиши мумкин.
Олий Мажлиснинг Инсон ҳуқуқлари бўйича вакили (омбудсман) Ахборот хизмати
