Buxoroning chekka hududida yashaydigan Olotlik fuqarolar uchun sayyor qabul tashkil etildi

Ombudsman institutining asosiy faoliyat yo‘nalishlaridan biri fuqarolar murojaatlari bilan ishlashdir. 2022-yilda uning hududlardagi mintaqaviy vakillari ish boshlashi bilan respublikaning chekka hududlariga borib, fuqarolar muammolarini o‘rganish amaliyoti yo‘lga qo‘yildi. Ombudsmanning Buxoro viloyatidagi mintaqaviy vakili tomonidan navbatdagi sayyor qabul joriy yilning 25-mart kuni viloyatning chekka hududlaridan biri hisoblangan Olot tumanidagi “Xalifa”, “Bunyodkor”, “Ma’rifat” va “Xalqobod” MFYlarida o‘tkazildi.

Unda fuqarolar sog‘liqni saqlash, pensiya, vasiylikka olish bilan bog‘liq masalalarda murojaat qilishdi.

Qabul davomida nazoratga olingan murojaatlardan biri Olot tumani fuqarolariga EXO va MRT kabi tibbiy apparatlaridan foydalanish uchun Buxoro shahriga qatnash uzoqlik qilayotgani hamda yashayotgan hududlarida ushbu xizmatlardan foydalanish uchun sharoit yaratib berish masalasida bo‘ldi.

Shu kuni Olot tumanidagi “Xalifa”, “Bunyodkor”, “Ma’rifat” va “Xalqobod” MFYda yashovchi fuqarolarning huquqiy bilimlarini oshirishga qaratilgan “Ombudsman maktabi” tadbiri ham o‘tkazildi.

Ochiq muloqot shaklida o‘tgan ushbu tadbirda ham hududlardagi aholi tomonidan yuborilgan murojaatlarda ko‘tarilayotgan masalalarga alohida e’tibor qaratildi.

Oliy Majlisning Inson huquqlari bo‘yicha vakili (ombudsman) Axborot xizmati