Oliy Majlisning Inson huquqlari bo‘yicha vakili (ombudsman) o‘z faoliyatida aholining huquqiy xabardorligini oshirishga alohida eʼtibor qaratmoqda. Chunki, Ombudsmanga yuborilayotgan murojaatlar tahlili so‘nggi yillarda aholining ijtimoiy himoyasini mustahkamlash, yashash sharoitlarini yaxshilash borasidagi islohotlardan xabardor etish zarurligini ko‘rsatmoqda. Shuning uchun 2022 yildan eʼtiboran respublikaning chekka hududlarida mahallalar kesimida fuqarolarga yaratilgan imkoniyat va imtiyozlardan aholi xabardorligini oshirishga qaratilgan “Ombudsman maktabi” loyihasi amalga oshirilmoqda.

Navbatdagi tadbir joriy yilning 24 noyabr kuni Namangan viloyati Chust tumanidagi “G‘ova” madaniyat saroyida o‘tkazildi. Unda “Yuqori”, “Tinchlik”, “Yangihayot”, “G‘ovasoy sohili” va "Varzigon" MFYlardan jami 80 dan ortiq fuqarolar ishtirok etishdi.

Markazdan olis chegara hududi hisoblangan G‘ova qishlog‘i o‘tkazilgan ochiq muloqotda “O‘zbekiston-2030” strategiyasi hamda aholini manzilli ijtimoiy muhofaza qilish yuzasidan amalga oshirilayotgan ishlar haqida maʼlumot berildi.

Loyiha doirasida Ombudsmanning Namangan viloyatidagi mintaqaviy vakilining fuqarolar qabuli ham o‘tkazilib, unda 30 nafarga yaqin murojaat qabul qilindi.

Shuningdek, tadbir yakunida Ombudsman mintaqaviy vakili boshqa mutasaddi tashkilotlar bilan birgalikda G‘ova qishlog‘idagi 6-sonli umumtaʼlim maktabi hududida “Yashil makon” umummilliy loyihasi doirasida ko‘chat ekish aksiyasi ham bo‘lib o‘tdi.

 Oliy Majlisning Inson huquqlari bo‘yicha vakili (Ombudsman) Axborot xizmati