Yig‘ilishda dastlab nodavlat notijorat tashkilotlari va fuqarolik jamiyati institutlari vakillari Komissiyaning 16–29 iyul kunlari Qoraqalpog‘iston Respublikasida yuz bergan holat va voqealarni joyiga chiqib o‘rganish bo‘yicha faoliyati bilan tanishtirildi. Xususan, bir qator davlat organlari va idoralariga, ijtimoiy obyektlarga, xususan  Qoraqalpog‘iston Respublikasi Jo‘qorg‘i Kengesiga, Ko‘p tarmoqli tibbiyot markaziga, harbiy va ichki ishlar gospitallariga, huquqni muhofaza qiluvchi organlarga, yaʼni Milliy gvardiyaga, Nukus shahar Ichki ishlar bo‘limiga, Nukus shahridagi Shimoliy-g‘arbiy harbiy okrugga, Nukus xalqaro aeroportiga tashrif buyurilganiga to‘xtalindi.

Shuningdek, Komissiya aʼzolari Qoraqalpog‘iston Respublikasida bo‘lib o‘tgan voqealar yuzasidan tibbiyot birlashmalariga murojaat qilgan shaxslar va o‘sha kungi voqealar natijasida jabrlanganlar bilan, jabrlanganlarning holati, ularga ko‘rsatilgan tibbiy yordam xususida suhbat o‘tkazib, voqealarga aniqliklar kiritgani, ushbu shaxslarga nisbatan prokuratura va ishchi ishlar organlari xodimlari tomonidan ko‘rilgan choralar o‘rganilgani qayd etildi.

Yig‘ilishda Komissiya aʼzolari tomonidan Qoraqalpog‘istonda mustaqil ravishda o‘rganish olib borilgani va aniqlangan faktlar har tomonlama o‘rganilayotganligiga urg‘u berildi.

Yig‘ilishda so‘z olgan nodavlat notijorat tashkilotlar vakillari ham xalq orasida ko‘p ko‘tarilayotgan savollar va ularga yuborilayotgan murojaatlar haqida to‘xtalib, Komissiyaning keyingi faoliyatida o‘rganilishi kerak bo‘lgan jihatlar bo‘yicha o‘z fikr-mulohazalarini bildirib o‘tishdi.

Oliy Majlisi Inson huquqlari bo‘yicha vakili (ombudsman) Axborot xizmati