Sayt test rejimida ishlamoqda / Сайт тест режмида ишламоқда / The site is running in test mode / Сайт работает в тестовом режиме
TelegramTwitterphoneInstagramYouTubeFacebook
Ombudsmanning Qashqadaryo viloyatidagi mintaqaviy vakiliga mehnat huquqlari buzilgan fuqarolar murojaat qilishdi
O‘zbekiston Respublikasi Oliy Majlisining Inson huquqlari bo‘yicha vakilining (ombudsmanning) Qashqadaryo viloyatidagi mintaqaviy vakiliga Qarshi shahrida yashovchi fuqaro N.Sh. murojaat qilib, Qarshi shahar “Suvtaʼminoti” masʼuliyati cheklangan jamiyatning ishchisi bo‘lganligini va  asossiz ishdan bo‘shatilganligini qayd etdi.

Mazkur murojaat mintaqaviy vakil nazoratiga olinib, Qarshi shahar “SuvtaʼminotiMCHJ rahbariga fuqaro N.Sh. mehnat qonunchiligiga zid ravishda ishdan noqonuniy bo‘shatilganligi va uning huquqlari buzilganligi tushuntirildi. Natijada fuqaro N.Sh. qayta o‘z lavozimiga tiklandi. 

Shuningdek, mintaqaviy vakilga Dehqonobod tumani Oqtirma Oqrabod qishlog‘ida yashovchi fuqaro Q.T. Qashqadaryo viloyati Transport boshqarmasi ustidan shikoyat qilib, ushbu boshqarmadan 2021 yil avgust oyi uchun rag‘batlantirish to‘lovlarini ololmaganligini bildirdi.

Maʼlum bo‘lishicha, fuqaro Q.T.ga O‘zbekiston Respublikasi Transport vazirligi huzuridagi Transport va logistikani rivojlantirish jamg‘armasi mablag‘lari hisobidan 2021 yil avgust oyida ishlagan 10 ish kuni hisobidan oylik mukofot, oziq-ovqat va yo‘lkira xarajatlari uchun jami 666,3 ming so‘m miqdoridagi pul mablag‘i to‘lab berilmagan.

Mintaqaviy vakilning ko‘magida unga ushbu miqdordagi mablag‘ to‘lab berildi. 

Oliy Majlisning Inson huquqlari bo‘yicha vakili (Ombudsman) Axborot xizmati